Dis Maartmaand wanneer ek en die toerleier Phil van Wyk van Bhejane 4x4 Adventures by die Palm Afrique Lodge net suid van Ghanzi aankom. Dis hier waar ons die res van die toergroep ontmoet voordat ons agt dae lank in die Sentraal-Kalahari-wildreservaat kamp.
Dis ’n warm aand en ek sit langs die swembad en werk met die laaste bietjie Wi-Fi voordat ons die veld invaar. Ons gasvrou, Sonia de Villiers, kom vra of ek iets by die kroeg wil bestel, en ons knoop ’n geselsie aan.
“Covid-19 was maar moeilik vir almal van ons in die bedryf, en dis lekker om die voete weer te sien instroom,” vertel sy. Die reënseisoen is al amper verby, en hulle hou asem op.
“Ons hoop en bid maar dat daar nog ’n bietjie reën val voor die droë seisoen begin.”
Ek hoop saam met Sonia, maar heimlik wens ek dat die reën kan wag tot ná ons toer, want ’n nat Sentraal-Kalahari kan sorg vir uitdagende bestuurstoestande.
Teen slaaptyd is dit steeds bedompig, maar die sterre gooi flikkers en ek gooi nie my reënseil oor die tent nie. Omstreeks drieuur daardie oggend word Sonia se wense waar – en hóé! Donderslae knal skielik en met ’n kopliggie skarrel ek om my tent waterdig te maak voordat die sluise oopmaak.
Dit sou vir die volgende sewe dae élke dag reën, byna sonder ophou…
DAG 1 Lekhubu-vallei
Hoewel Phil reeds seweuur die oggend wou ry, moet ons noodgedwonge wag vir die gietende reën om te bedaar – uiteindelik val
