Wyle Elspeth Jack was nie net ’n begaafde musikant nie, maar sy was ook oortuig van die krag van musiek om mense te genees. Toe sy dus in 1999 na haar seun, wynmaker Bruce Jack, se plaas in die Overbergse hoogland digby Napier trek, het sy haar passie vir musiek met haar belangstelling in mense gekombineer en gratis vir talentvolle plaaskinders begin musieklesse gee.
“Baie van daardie kinders werk nou as musikante reg oor Suid-Afrika. Sy laat dus ’n ongelooflike nalatenskap. Sy was ’n briljante musiekonderwyser,” het Bruce tydens Cape Wine, ’n wynhandelskou in Kaapstad, vertel.
Elspeth se goeie werk het hom begeester om geld in te samel om musiekonderrig en
-lesse vir skoolkinders moontlik te maak. Die projek heet The Headstart Music Trust en 350 kinders uit vyf verskillende Overbergse skole word weekliks aan die wonder van musiek blootgestel.
“Dit was ’n merkwaardige reis tot dusver,” sê hy en vertel trots dat hulle volgende jaar ook vyf mobiele musiekskole gaan bekend stel wat jong kinders op die plase gaan bereik. Die trust word gefinansier deur ’n deel van die opbrengs van elke bottel Bruce Jack Wines wat verkoop word, asook deur skenkings van oorsee.
