DIE beskrywings klink so bekend: ’n prinses vir die mense; ’n omgeemens wat haar kinders liefhet en goedhartig teenoor oud en jonk optree; ’n koninklike met een voet in die tradisie en die ander in die moderne wêreld.
’n Mens sal verskoon word as jy dink dis ’n nostalgiese terugblik op wyle prinses Diana. Maar nee, al dié mooi dinge word ál meer gereeld gesê oor die eerste vrou sedert Diana wat die titel “prinses van Wallis” dra: haar skoondogter Kate.
Terwyl almal se aandag die laaste ruk aan die oorkant van die oseaan is waar Harry en Meghan die een bom ná die ander afvuur, het Kate stil-stil in Brittanje haar rol uitgebrei deur meer en meer openbare verskynings te doen – en sodoende ál dieper in haar mense se harte geklim. Daar word selfs deesdae van haar gepraat as “die Huis van Windsor se geheime wapen”.
Met haar kuiltjie-glimlag en gemaklike elegansie is sy ’n staatmaker wat altyd haar werk sonder drama gedoen kry. Sy verteenwoordig ’n bietjie waardige stabiliteit waarna die Britte in hul skandaalgeteisterde koningshuis smag.
Dit is maklik om haar te vergelyk met die skoonma wat sy nooit ontmoet het nie.
