Die Oos-Vrystaat se landskappe is omtrent bekoorlik. Die golwende groen heuwels van die somer verkleur tot ’n warm goudgeel in die winter – dan herinner die kaal wilgerboomtakke ’n mens aan die flieks van Tim Burton. Dié deel van die Vrystaat kan selfs sneeu kry.
Ongeveer 40 km oos van Vrede lê André en Ansie Podges se Oppi Rooiplaas-kampterrein knus tussen die Kliprivier en ’n klipkoppie. Die Kliprivier vorm die grens tussen die Vrystaat en Mpumalanga, en hoewel die kampplek in Mpumalanga lê, lyk die suidelike punt van dié provinsie pure Oos-Vrystaat. As jy dus op soek is na ’n klein en intieme wegbreekplek met geen selfoonsein nie (daar is swakkerige sein sowat 800 m van die kamp af), is Oppi Rooiplaas die plek vir jou. Ansie sê sy neem nooit besprekings vir meer as 20 mense nie, en dan ook hoogstens vier waens. Sy sal mense wat mekaar nie ken nie, saam laat
