Twee jaar gelede het haar hare in bossies uitgeval ná sy dit wit gekleur het. Baie van ons ken mos daai Desember-gier vir blonde hare - net om in Januarie sonder hare te sit!
Dís presies wat met Leshmede Bruyn (33) gebeur het.
Leshme moes noodgedwonge haar hare - dít wat nog oor was - afsny, maar pleks van winkel toe hardloop om produkte te gaan koop om haar fout te probeer regstel, het dié Kapenaar in haar ma se medisynekabinet ingevaar.
Dit was in Februarie 2021 én in ‘n tyd toe die natural hair movement begin vlamvat het. Wyd en syd het mense vertel hoe hulle hul hare versorg met produkte uit hul kos- en yskas. Oumensrate.
In haar ma se kabinet het sy olyfolie, coconut-olie en rosemary aangetref, dit saamgemeng en aan haar hare begin smeer. Nadat sy ses tot agt weke lank dié oliemengsel gebruik het, het Leshme besef sy het ‘n wenresep beet, want nie net het haar hare begin teruggroei nie, dit het ook sterker en dikker geword!
