Marchelle van Zyl verskyn op die Montagu Country Hotel se voorstoep. Sy’s uitgedos in ’n das en baadjie, met ’n Oliver Twist-keps op die kop. Die kakielangbroek is by geel sokkies ingesteek en daarby dra sy ’n paar velskoene. Dis allesbehalwe gewone fietsrydrag! Maar hierdie is ook allesbehalwe ’n gewone fietstoer.
Dis April en fietsryers van reg oor die land is die naweek hier vir die jaarlikse Eroica-fees, ’n Italiaans geïnspireerde viering van alles wat met klassieke fietse te make het. Ons is ’n groepie vriende wat lief is vir ouskool fietse en gaan saam met Marchelle die dorp met singende speke verken.
Sy lei ons met Badstraat langs en die eerste stop is voor Montagu se imposante NG Kerk. Die sakeman Joseph Barry na wie die buurdorp Barrydale genoem is, het dié Neo-Gotiese gebou in die middel 1800’s in opdrag van die gemeente laat oprig. Die kerk het van haar eiendom verkoop en belasting ingevorder om vir dié aanbiddingsplek te betaal.
Ons bondel om Marchelle saam toe sy haar toer met ’n staaltjie oor ’n kat genaamd Heather begin.
Dié kieter wat in die 1990’s op Montagu gewoon het, het glo ’n byna bonatuurlike aanvoeling gehad vir mense wat ’n bietjie troos
