REEKS
As plant, spuit en stroop die drie glansryke sussies van rygewasverbouing is, is grondbewerking die getroue, stil suster wat op die agtergrond die pad gelyk maak. Grondbewerking is nie so voor op die wa soos stroop, waar opbrengste direk in rande omgeskakel word, so optimisties soos plant, waar individuele sade deur hoogs gespesialiseerde planters net mooi reg en presies met die belofte van ’n groot oes neergesit word, of bespuiting se berekende aksies, waar ingewikkelde formulasies en slegs die regte druppelgroottes die beste ondersteuning en sorg aan die oes bied nie.
Lank was grondbewerking die stowwerige voorplantgedagte waar ’n stuk yster vinnig deur ’n land gesleep is om ’n saadbedding te skep sodat die planter, spuiter en stroper die soort werk kan doen wat op menige Landbouweekblad-voorblad te sien is.
Vandag is grondbewerking op die punt waar dit net so noukeurig en presies is soos die ander, meer hoëprofiellandbou-aksies. Dit skep immers die grondslag waarop al die volgende aksies gebou word om die beste opbrengs te lewer.
Alles begin by data-insameling
Hoewel grondbewerking tradisioneel gesien word as die begin van ’n seisoen, vind die inligtingversameling reeds die voorafgaande seisoen plaas en maak dit vir werktuie moontlik om ál akkurater te werk.
“Die beginpunt wat hierdie tegnologie ondersteun, is grondklassifikasie,” sê Thomas Strydom,-vrugbaarheid. “Grondklassifikasie word al die afgelope dertig jaar toegepas, maar danksy nuwe tegnologie kan boere dit nou sinvoller aanwend.
