Hoekom Skotland?
Ek het jare gelede betower geraak deur die Hooglandse Skotte toe ek Diana Gabaldon se Outlander-boeke (wat later vir die televisiereeks verfilm is) gelees het. Groot was my opwinding toe my swaer so drie jaar gelede ’n plaas in die Aberdeenshiredistrik, naby Inverurie, in die noordooste van Skotland koop. Sy droom was om die res van die familie mettertyd ook op die plaas te vestig. Toe ons huis op Kleinmond se huurkontrak verlede jaar verstryk en ons seun, Tiaan, se studies op Stellenbosch ten einde loop, het ons die groot stap geneem. Ons het met net twee tasse elk hier geland en ek was nog nooit eens in Europa nie!
Wat maak Skotland besonders?
Daar is ’n romantiese misterie aan die misomhulde Hoogland, die diep, stil (mere) en die aardse mense. Skotland is meer ongerep as die res van die Britse Koninkryk en ek dink ons Afrikaner-harte kan daarmee vereenselwig.
