Dans van die renoster
Ek het in Augustus 2023 ’n paar dae in die Mabalingwenatuurreservaat naby Bela-Bela deurgebring om my verjaardag te vier. Ons is behoorlik bederf met wonderlike wildtonele, maar die hoogtepunt was hierdie interaksie tussen witrenosters by ’n watergat.
Met ons aankoms was alles rustig... totdat ’n jong bul met ’n koei en haar kalf begin skoorsoek. Vir meer as drie ure het die bul die ander renosters stormgeloop en die koei het hom telkens teruggedryf met die kalf aan haar sy. Ná elke aanval het die bul kamma ongeërg in die son gebak of in die modder afgekoel. Maar skaars 10 minute later sou hy weer storm. Hy het selfs soos ’n wafferse springbok met al vier pote in die lug gespring asof hy trots is op sy uitdagende lopies.
Naderhand het ’n ouer renosterbul opgestaan en die jong bul op ’n afstand gehou, maar dié het om die dam geloop om sy teikens van die ander kant af by te kom. Ons moes ongelukkig later na ons kampplek terugkeer, maar