Vir die ANC is 2024 ’n maak-ofbreek verkiesing – gaan hy 50% haal in die nasionale en provinsiale verkiesing, of dalk selfs meer kry?
Theo Venter, politieke ontleder, sê op grond van 2019 se nasionale en provinsiale verkiesing, 2021 se plaaslikeregeringsverkiesing, meningsopnames en tussenverkiesings is die ANC se steun wel besig om af te neem en dit kan selfs tot onder 50% daal.
“Die ANC én die DA is besig om steun te verloor en daardie steun word deur onderskeidelik die EFF en Action SA opgeneem.”
Mpumelelo Mkhabela, politieke kommentator en skrywer van The enemy within: How the ANC lost the battle against corruption (Tafelberg), stem saam met Venter. “Opnames wys tot dusver die ANC se politieke steun is besig om te daal. Dit is egter nie nuut nie en het al in 2009 begin, en die vorige nasionale en munisipale verkiesings sinspeel daarop. Die ANC se eie opnames wys ook die daling. Die vraag is met hoeveel sy steun gaan daal.
“In 2024 se verkiesing maak alle partye en hul leiers saak omdat daar verwag word dit gaan hoogs bestrede wees. Hierdie verkiesing gaan baie mededingend wees en daar is baie op die spel, want ’n party met 1% (van die stemme) sal ’n rol hê om te speel binne die totale dinamika.”
Mkhabela sê die ANC sal dopgehou word oor wat hy kan verloor, terwyl die ander partye sal kyk wat hulle ten
