DRAKENSBERG
Wanneer ’n mens op ’n helder dag by die Cathedral Peak Hotel aangery kom, glimlag jy onwillekeurig. Die pieke van die Drakensbergse platorand gooi omtrent flikkers terwyl die son sak.
Môre gaan ons stapgroep in daardie einste berge wees. Ons gaan vyf dae lank alles wat ons nodig het, op die rug dra.
En wanneer ’n mens dóér bo op die platorand staan wat agter die hotel uittroon, kyk jy af op hierdie vallei en geskarrel van lewe hier onder lyk dan skoon onbenullig. Kom stap saam tot in die hartjie van die Drakensberg se hoogtes.
DAG 1
Mnweni-kultuur-en-stapsentrum na Mnweni-vallei (11 km)
Op die uur en ’n half lange rit van die Cathedral Peak Hotel af tot by die Mnwenikultuur-en-stapsentrum leer ek en die groepie stappers wie ek gaan begelei mekaar beter ken: die fotograaf Scott Ramsay en ’n Amerikaanse wittebroodspaartjie Felicia Hsu en Chen Xie. By Mnweni ontmoet ons vir Leonard Hlatswayo wat dié gemeenskapsgedrewe toerismeinisiatief bestuur, asook my medegids, Caiphus Mthabela, en die twee portiere, Sabelo Zwane en Ntokozakhe Hlongwane.
Met die permitte afgehandel, word ons rugsakke op ’n bakkie se dakrak vasgestrop en ons nog ’n entjie nader na die berg se voetheuwels aanry. Vriendelike gesigte loer by rondawels uit, mense wuif terwyl beeste ons ongeërg agternakyk.
Die roete begin onder in die vallei. Voor jou lê die Mnweni-rivier en doer bo toring die Mnweni Pinnacles. Dié
