'n Silwerdoek-droom is gebore toe twee boesembrasse op die vloer gesit en aan die einde van 'n swaar maand hul laaste bietjie koffie sonder melk moes afsluk.
Solomon Cupido en sy jarelange vriend, Bradley Olivier, het daai dag nog na mekaar gekyk toe hulle dié melklose koffie drink en net daar besluit: Dís nie die lewe wat hulle wil hê nie.
Die akteurs is altwee familievas en wou net die beste vir hul kinders nalaat. Bradley vir sy pragtige dogtertjie, Kiara (6), en Solomon vir sý drie kinders: sy dogter, Yadah (8) en vyfjarige tweelingseuns, Yael en Yoel. “Ons wou 'n verandering maak, nie net vir ons nie, maar vir ons nageslag ook,” vertel Solomon (37), 'n bekende komediant en vervaardiger. “Ons albei het 'n gesin en ons wou nie só leef nie.
