Die Wildekus se naam vertel jou alles wat jy moet weet: Dis afgeleë, onderontwikkel en deurspek met egte wilde plekke. En Pondoland, tussen die Mthatha- en Mtamvunarivier waar die Oos-Kaap en KwaZulu-Natal bladskud, is nog die heel “wildste” deel. Hier’s maar min inwoners en vee, maar vele legendes en ’n oordaad natuurskoon wat ’n mens eintlik net te voet behoorlik kan verken.
Daar is verskeie ondernemings wat begeleide staptoere in Pondoland aanbied. Ek is hier om Wild Child se vier dae lange Pondo-slenterstap mee te maak en het gister reeds uit Kaapstad Durban toe gevlieg en daarna Port Edward toe gery. Maar steeds is ek nog nie naby die roete se beginpunt nie. “Ek hoop julle is gereed vir ’n paar spesiale dae,” verwelkom die gids Wojtek Orzechowski my en die res van die stapgroep op die grasperk voor die Estuary Hotel. “Ons is gelukkig – dis ’n pragtige dag en die see is mooi,” voeg hy by.
Wag ’n bietjie… wat’s dit nou van die see?
DAG 1 15 KM Mkambati na Msikaba
Die volledige inligtingspakket wat Wild Child vooraf vir ’n mens stuur, het gewaarsku dat ons vir ’n ware avontuur moet voorberei en ook seker kan wees dat ons nat gaan word.
En die eerste kans hiervoor is sommer op ons...
Ons stap die kort entjie van die hotel af strand toe waar twee rubberbote wag. Die stapgroep word in twee verdeel en ná ’n veiligheidspraatjie gryp ons die toue alkant van die boot en skrum dit die see in tot waar almal
