FIONA MCINTOSH
Apex Geo 200-tent
Een van dié heeljaar-tweemantent se groot trekpleisters is hoe maklik dit op- en afslaan. Jy slaan die tent en sy boseil tegelyk op: Steek net die kleurgekoördineerde tentpale inmekaar, glip dit deur die slopies op die boseil en ta-daa!
Met ’n gewig van 2,7 kg is dit nogal lig maar ruim binne, met ’n skaflike“stoepie” waar twee persone se groot ruksakke maklik inpas. Die buiteflappe voor die deur kan links óf regs ooprits, of jy kan die hele toetie oprol vir ’n onbelemmerde uitsig.
R6 600 rammountain.co.za
Black Diamond Women’s Pursuit-rugsak
Toe ek dié sak die eerste keer sien, kon ek nie glo dit het ’n kapasiteit van 30 ℓ nie. Die ontwerp is so slank, dit lyk soos ’n 20 ℓ-sak! Die rugsak vou soos ’n drukkie om jou en die rekbare materiale en kompressiestelsel maak dat dit knus teen jou lyf sit – soos ’n onderbaadjie. Selfs wanneer die sak propvol gelaai is, voel dit steeds stabiel en gemaklik op my rug.
Dit het bêreplek vir jou stapstokke, heelwat sakkies voorlangs en op die kante vir items wat jy byderhand wil hê, ’n waterbestande rits en buiten die hoofkompartement ook twee kleineres (een binne, een buite). Die maassak agterop is ook maklik bereikbaar.
R3 700 rammountain.co.za
Sea to Summit-opvoubeker
Sea to Summit se X-reeks van opvoubare, liggewig bekers, bakkies en potte is al ’n geruime tyd gewild onder stappers en kampeerders. En nou is die nuwe Frontier-reeks selfs nóg beter: Dié ultraligte