Die lees van die woord “wildernis” vuur in baie stappers se gemoed ’n noodfakkel af. Hulle hou van stap en buite wees, maar soek sekere geriefies: ’n hut, spoeltoilet, gemerkte roetes… daai soort ding. Dit skep die verwagting dat jy deur digte plantegroei gaan stoei, ’n GPS moet hê, ’n tent saampiekel, na water soek…
Maar nadat ’n mens hierdie roete gestap het, kan jy nie help om te wonder of “wildernis” ingespan is om dié plek geheim te hou nie. Want die Boosmansbos-wildernisroete in die gelyknamige wildernisgebied langs die Grootvadersboschnatuurreservaat is redelik mak.
Die roete is goed aangedui, die paadjies is merendeels netjies en hier’s skuilings waarin stappers kan oornag. Dié staan in ’n donkergroen vallei diep in die Langeberg waar ’n stroom verbykabbel. Dis die soort plek waar ’n mens vir ewig van die beskawing kan wegkruip.
DAG 1 14 KM Grootvadersbosh na Helderfontein
Teen 7 vm. trippel ons senuweeagtig rond in die parkeerterrein by die ontvangskantoor van die Grootvadersbosch-natuurreservaat terwyl ons vir die Montagu-kar wag. Die res van ons stapgroep het reeds gisteraand in die reservaat geslaap, want ons wil juis vroeg wegkom sodat ons later vandag baie tyd in die mooi Helderfonteinvallei kan deurbring. O, ja, en hier’s byna geen skaduwee langs die roete nie. Hoe gouer ons dus die dag se skof kan kafdraf, hoe beter.
Gelukkig is dit ’n koel, bewolkte
