Hulle wou al baie meer vermag het, maar deur te begin met dít wat hulle gehad het, is hy en sy vennote stadig maar seker besig om ’n boerdery staan te maak wat ’n beter toekoms vir hul kinders kan beteken, vertel Johannes Kamfer, terwyl hy na die vrugtebome by Tierberg Nurseries kyk.
Johannes is saam met Bernard Engelbrecht, Dawid “Duimpie” Steenkamp en Shirley Engelbrecht die vier begunstigdes van Ceres Tierberg Boerdery, ’n vrugte-engroenteboerdery in die Koue-Bokkeveld wat met die hulp van Ceres Remhoogte Boerdery “happie vir happie, soos ’n mens ’n olifant eet”, op die been gebring word.
Ceres Remhoogte Boerdery is in 1895 begin. Die vyfde geslag van die Du Toit-familie, Heinie du Toit en sy suster en swaer, Nonna en Stokkies Hanekom, boer vandag daar.
“Ons waardes, visie en missie sê eintlik alles: Dat ’n hoër doel vir ons die belangrikste is en om ’n demonstrasie van God se koninkryk in die landbou te wees. Ons Christelike waardes en manier van doen is vir ons ononderhandelbaar, en dit kom al van ons oupagrootjies se tyd af,” vertel Heinie, en sê dit druk nou al lank op die familie se harte om grond en produksiegeleenthede aan die mense te gee wat geslag ná geslag saam met hulle die boerdery opgebou het.
“Toevallig is dit toe ook politiek korrek,” sê Heinie, wat ook visepresident van Agri Wes-Kaap is.
Die regte struktuur
Hulle het al meer as tien jaar gelede begin woeker met die
