![f0039-01.jpg](https://article-imgs.scribdassets.com/3zddc4d8jkcov87k/images/file538J3DXV.jpg)
✽ My ma het my al baie vertel hoe arm hulle grootgeword het, maar dat daar altyd 'n oorvloed van liefde en kos in hulle huis was. Dit is presies hoe ek my ouma Bessie onthou … haar hart en haar huis was altyd oop vir ✽ My ouma en oupa het gewoon op Lambertsbaai, 'n klein vissersdorpie aan die Weskus. Ek onthou hoe ons vakansietye vroeg wakker geword het soos Ouma die skuifraamvensters, wat met toue gewerk het, opgestoot het vir die seelug om in te kom. Daarna het sy en my oupa huisgodsdiens gehou en jy kon in die oggendstilte hoor hoe daar vir elke kind en kleinkind gebid word. ✽ Ouma se hande het vir niks verkeerd gestaan nie en sy was op die dorp bekend vir haar lekker melktert. Sy het gedurig geëksperimenteer, want die voetsooltjie moet dun wees en die vulsel mag nie sak nie. Sy was ook baie lief vir naaldwerk en het die mooiste skinkbordlappies en servette met soveel liefde en geduld geborduur. ✽ Ek sien nou nog hoe Ouma haar magrietjies natmaak met die tuinslang, met haar blou laphoedjie op haar kop en haar geblomde rok. Sy het altyd haar gunsteling-borsspeld daarby gedra. ✽ Ek onthou hoe lekker sy kon lag en hoe lekker sy die bekfluitjie kon speel. Ek onthou hoe haar oë ondeund kon vonkel en hoe haar oë dan weer sag kon word.