SY KAN skaars by ’n winkelsentrum instap of sy word oorval deur sepiekykers of aangekeer deur iemand wat ’n foto saam met haar wil neem. Soms noem hulle haar sommer op haar karakternaam, Susan Naudé (oftewel Suzie), en wil hulle weet waar Juicy Justin, haar eks in die sepie Suidooster (gespeel deur Eden Classens), is.
Party akteurs sou dié aandag as lastig beskou, maar nie Natasha van der Merwe nie. Sy staan nader en glimlag breed.
“Ek is so geseënd, want ek is in die posisie waar ek kan teruggee en stop om ’n foto saam met mense te neem.
“Hulle kyk immers elke aand na ons op televisie.”
Hoe kan sy anders as dankbaar wees? Sy het immers 13 jaar lank geswoeg om hierdie sukses te bereik.
