DOER in 1957 stap ’n donkerkopseuntjie na die kafee op die hoek, net om die draai van sy ouerhuis in Primrose, ’n woonbuurt in Germiston. Voor die kafee staan ’n voertuig geparkeer met die deure oop terwyl die musiek uit die motorradio se luidspreker blêr.
’n Groep van so vier of vyf jong mans staan langs die kar, botteltjies Coca-Cola in die hand, en swaai die lyf op die maat van ’n rock-’n-roll-nommertjie.
Die sewejarige Alex Tebbutt staan nuuskierig nader.
Sjoe, hy ken nie dié liedjie nie, maar hy hou daarvan, is die eerste gedagte wat deur sy kop gaan.
“Oom, wie sing hier?” vra hy vir een van die jong mans.
‘IN AMERIKA KRY JY DIE GROOT GRACELAND, EN IN GERMISTON DIE KLEIN GRACELAND’
Dis Elvis Presley,
