Op 26 Desember 2023 het die geliefde sepie 7de Laan ná 23 jaar en 24 seisoene tot ’n einde gekom . . . Ná baie dramas, romanse, avonture, lag en huil, het die land finaal die inwoners van Hillside gegroet.
In ’n era waar werklikheidsreekse die wêreld gaande het, wonder ’n mens of sepies nog vir kykers dieselfde betowering inhou. Met huisvroue wat amok maak, vroue wat swymel oor losloper Brendan Peyper wat steeds “op sy eish” is en Boer soek ’n vrou-aanhangers wat 16 seisoene later steeds vasgenael sit . . . soek kykers nog hul daaglikse dosis drama in storievorm?
E.tv sê onomwonde “ja” met * dié kanaal se eerste plaaslik vervaardigde daaglikse Afrikaanse drama wat in Mei afgeskop het – in dieselfde tydgleuf waarin altyd op SABC2 uitgesaai is. Helga Palmer, groephoof van inhoudsontwikkeling by e.tv, stel dit só: “Ons oorgeklankte Afrikaanse programme [Turkse telenovelles] is baie goed ontvang deur ’n groot verskeidenheid gehore van reg oor Suid-Afrika. Daar
