الضريبة 40 %

By أحمد الطحان

ديوان شعر
للناس والحكاوي المِتْكرّرة للّي جَرّبُوني وجَرّبتُهم ل فران التجارب بشكل عام لأيّ فِرقة فيها حَرّيفة ومفيهاش انسجام للنشيد وللطابور وللعَلَم ولأيّ واحد اتخَبَط على ضهره فـ لَفّ.. اتضَرَب بالقَلَم للشِعر.. وطاووسُه للناس اللي بيجلدها.. مع إنها بتبوسُه للّي عَلّمونا الشِحاتة.. وسَبَقونا بالغياب للّيالي الرخيصة والتَعَب والعتاب للّاوعي الحقيقي والوعي الكدّاب

• Language: العربية
• Publisher: Dawen for Publishing
• Release date: May 30, 2024
• ISBN: 9789778061482

Book preview

الضريبة

أحمد الطحان: الضريبة، ديوان بالعامية المصرية

الطبعة العربية الأولى: ديسمبر ٢٠١٨

رقم الإيداع: ٢٧١٨٨ /٢٠١٨ - الترقيم الدولي: 2 - 148 - 806 - 977 - 978

جَميــع حُـقـــوق الطبْــع والنَّشر محـْــــفُوظة للناشِر

لا يجوز استخدام أو إعادة طباعة أي جزء من هذا الكتاب بأي طريقة

بدون الحصول على الموافقة الخطية من الناشر.

© دار دَوِّنْ

عضو اتحاد الناشرين المصريين.

عضو اتحاد الناشرين العرب.

القاهرة - مصر

Mob +2 - 01020220053

[e-mail]

www.Dardawen.com

أحمد الطحان

الضريبة

ديوان بالعامية المصرية

مقدمة الديوان

هذا مابينفيش وجود هذا

صاحبي يا مصلوب على ازازة

اه صحيح السُكر بيداري

بس ريحة الخمرة نفاذة

مهما كان فيه راحة في التوهة

برضه محتاج فوقة... وأجازة

تفصيلات بتبان قصاد عينك

زرعوا تاج من شوك على جبينك

كل حوارييك مساندينك

امتى كان فيه حواري ليه عازة؟

العبث وياك بيتجلى

مش هتبقى مسيح... ودي العِلة

عيسى مات مصلوب... فعاش مِلة

وانت أخرك نعش في جنازة

يبقى كل الدوشة دي لماذا؟

عمرو أبو زيد

تمهيد:

كلنا إخوة في فؤاد حدّاد

مهما تفصلنا بشر وبلاد

الإهداء

إهداء لروح يوسف ابن مروة قناوي

للرضا.. أكبر إشاعة مُغرِضة

لكل اللي اتكلموا بدَمّ بارد عن الحاجات اللي لسّه دمها ما بردش

تحديدًا ليّا

لأساليب التعذيب اللي عرفتها بحُكم موقعي الحسّاس في الأوضة

للعروض الوهمية المتبادلَة

للناس اللي بتِطلَع صح في الآخر

والناس اللي بتطلَع غلط في الآخر

والناس اللي بتُقع في النُص

للفُرجَة مِنْ بعيد

للأسانسيرات اللي فيها كراسي.. مُنتهَى الرحمة

للفَخْر.. الإحساس اللي أمي مش هتحسه طول ما أنا عايش

لأشخاص بعينها

وأشخاص في عينها

وأشخاص بيعَدّوهالي وبَالعِينها

للناس اللي وقفوا في وسط السِباق عشان يشربوا سيجارة

للمحاولات الأخيرة.. المِتْأخرة

والفُرَص المُهْدَرة

والفُرَص المُستغلَّة مِنْ ولاد المَرة

لوجع القلب اللي بيبتدي بقَسْطَرة

للناس والحكاوي المِتْكرّرة

للّي جَرّبُوني

وجَرّبتُهم

ل فران التجارب بشكل عام

لأيّ فِرقة فيها حَرّيفة ومفيهاش انسجام

للنشيد

وللطابور

وللعَلَم

ولأيّ واحد اتخَبَط على ضهره فـ لَفّ.. اتضَرَب بالقَلَم

للشِعر.. وطاووسُه

للناس اللي بيجلدها.. مع إنها بتبوسُه

للّي عَلّمونا الشِحاتة.. وسَبَقونا بالغياب

للّيالي الرخيصة

والتَعَب

والعتاب

للّاوعي الحقيقي

والوعي الكدّاب

لرقبة فَكّرتها مِلْك شفايفي للأبد

للضيوف الخُفاف

والمَحَبة مِنْ ورا ستارة

وقصايد مكافأِة نهاية الخِدمة

ل علام.. حارس زنزانة المستشفى

و ل مصطفى.. وريث فؤاد حداد

ل «ماليش أمل ف الدنيا دي».. ل ليلى مراد

و ل سارة.. سارة اللي ليها ولاد

ل نادر.. وإيتو.. تجار السبرتو

وأبويا اللي سبته

وغبت ف عزاه

ل بهاء سلطان

والكورال اللي وراه

ل عمرو اللي عانى معايا

ولسا.. هيفضل يعاني

وحسن اللي جازف بروحه

عشاني

ل عمرو البرباوي.. لأنه بطل شعر بالتدريج

ل يحيى قدري.. أولى شاعر عايش بمنصة التتويج

ل اسكندرية.. قبل ما مصر تحتلها

و لممدوح قبل ما يعجز يفرق بين الجد و التهريج

و ل أحمد رجب.. عشان ابن نكتة

وصاحبي اللي لما تركني.. تركته

ل دكتور أحمد يوسف