是啥物代誌予肚胿仔星雲遮爾鬧熱？是恆星形成活動啦！有厚塗粉發射線 ê 肚胿仔 星雲 IC 410 離咱有 1 萬 2000 光年 遠，就 tī 北天 ê 車夫 星座，御夫座 遐。這个發光雲有超過 100 光年闊。伊是去予藏 tī 星雲內底 ê 開放星團 NGC 1893 ê 恆星風 kah 輻射 雕出來 ê 形體。伊是 400 萬年前 才拄 tī 星際雲內底形成--ê。規个恆星形成雲內底攏是足光、拄生出來 ê 恆星。注意看 這張圖 ê 倒爿下跤，有兩个較實密 ê 物質流，當咧離開星雲中心。這寡 宇宙肚胿仔 是 IC 410 內底有機會形成新恆星 ê 所在，in 差不多有 10 光年長。這張影像是 kā 硫磺 (紅色)、水素 (青色)、kah 酸素 (藍色) 氣體 ê 發射線加強 ê 結果，毋過已經 kā 恆星用數位處理 ê 方式 kā 提掉矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221219/ 影像：Craig Stocks (Utah Desert Remote Observatories) 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221219.html Powered by Firstory Hosting